1Th 5 | BEF | STEP | Lalalutigita Sipi Boti alina kana'a yamofi hiti to alihi huto hilina asaga'namofi hiti fayahi koyoto lepiba lepiba mehilune.

1 Thessalonians 5

Sipi Boti alina'mu kaba huto minalune

1 Lalalutigita Sipi Boti alina kana'a yamofi hiti to alihi huto hilina asaga'namofi hiti fayahi koyoto lepiba lepiba mehilune. 2 Lenalitini ya'ma Sipi Boti alina kana'amu ma lite kehelilata nehabe. Ya'ma guminalo bona'i folugu'i suguna huto alina suhi huto mele'isi nehetilina keheli'ahabe. 3 Bona'magi bati huto legeso huto nominone lite legeso hite nehanogo ana kanagu koli'a hiti nasanauba mele'isi o nehetinogo enugupisalo finogo, enali felefa hilana meni'ibe. To a'i moneuba yagapana ma'asi ketalube'mu nohuto mele'isi gabu gigo keke luto topa holata nohibe. To ana suhi huto Sipi Bouba mele'isi nehetinogo hiya huto felefa hilabe? Koli hilana ni'ibe. 4 Lalalutigita, lenali Kilisitohi naga'a nehanagi ya'ma metepunagu menehabe. Ya higo ya'mu Sipi Bomofihi kana'a mele'isi guminalo bona'magi nehe netilana suhi huto lenalitoga nehetinogo henabe lite katiya'i hite lenelesa lilibe? 5 Lenali fana mehenamofihi to yege'amofihi komopa'agu nehabe. Lali Kilisitohi naga'amagita sinihi to metepunamofihi komopa'agu menohune. 6 Ya'mu bona'i luga'a enali enubu'i kelata nehana suhi lite meminalo. Komopatini lenegekesa hekini melenogo lenalitini kaba hite gili gili hite minalo. 7 Enubu'i kelata nehana bona'i enali sinihinaga enubu'i kelata nehabe. To amuya nagami'i nelata hite negi nenalana bona'i enali sinihinaga nete nehabe. 8 To lali fana mehenamofihi naga'i lolo hu'ohuta ya'ma komopati kaba huto minalune. Ya nohuto Yesutoga keheli amuya malaluta to komopati asaga bonatoga epiluta yanauba heleguti lolo hilibe. To Hu'mau lubuto bilina keheli'ohutanauba lali latahati li sibina hu lalina kakiliti lolo hu letalibe. 9 Yamofihi hapa'a ya huto ni'ibe. Hu'mau siko hu letoto osahi limilibe luto lele'mo'ehina meni'ibe. Ai Sipi Boti Yesu Kilisitou lubuto bilata hinogo li bati hilabe luto lele'mo eto hu'ehinamo ni'ibe. 10 Sipi Botiuba lali kumu luto fili'ehinamo ni'ibe. To henabe lutobe? Ai alina kanagu lali lubu hiti nohutamagita to afili su ho'ohutamagita lele'mo nupa higo ai hiti minalune luto yabe. 11 To ya huto ni'igo lenali komopatini ai eminogo ai eminogo hite minete to ai he'menogo ai he'menogo hite minete amuya melenogo yanauba lenemehatini hofa toto tinogo bati hite lilata nehana ya suhi hinogo lelite bite minalabe.

Polu enegekesa lito keke'i hu epolo'ehina

12 Lalalutigita, ana'ina mone kumu lenoloka amuya nohone, Hu'mau lenalitoga foya'a lilabe luto to lenegekesa hokolo hilabe luto to ai kapo'a lenelepilabe luto to lenegekesa hokolo hilabe luto to ai kapo'a lenelepilabe luto le'mo ho ti'ehina bona'i enali kumu kehelinogo bati hino. 13 Ya hite keheli hofa tete komopatini epite foya'ani'mu kehelinogo tino. To lenali folagatinigu koguna ite minalo.

14 Lalalutigita, lenegekesa li hokolo huto lenogo'na bito lu nolepune. Bona'i luga'amagi foya melise nehanogo enali enegekesa lilo. To luga'amagi enelesa nelinogo neminana enele'mo hetofa hilo. To luga'amagi keheli ule'ale mehise loe lae nehinogo enali enele'mo amuya hilo. Ya hite asaga bona'magitoga legeso hite minalo. 15 To foipanamofihi nona'amu yabe lite ai henogo ai henogo li muyalo li malo mehilo. Ya hu lalune lite lenalitogati to bona'i asagatoga ana'ina li lamana hu epalalune lite amuya melete minalo.

16 Asaga yupahi komopatinigu sabiyana lolo higo minalo. 17 Asaga yupahi Hu'mamofitoga kehelite lu emilata nehite mehe'mise minalo. 18 Ana'ina asaga'i ni'ina yana'mu Hu'mamofihi fokehi lilo. Ya'ma Yesu Kilisitohi naga'i lolo hana'mu yabe luto Hu'mau ya'ma luto nolu lepalabe.

19 Hu'mamofihi Sikalafu'amofihi fana meha'a ya'ma ifi metalo. Ai'a ka'a mehe'milo. 20 Hu'mamofihi bagaguti ka lu'ehina kehelinogo ya'ma melimino. 21 Ka'ya asaga'i ya'ma keheliya ite li kehelite lite minalo. Lama'na ka ni'ifi foipa ka ni'ifi lite ana kaga fi taga hite kehelitetini to lamana'a ni'inogo yamofihi li pili kete minalabe. 22 Ana'ina foipana fato fato'mofihi ni'ina yamofihi he'milo.

23 To Hu'mau fulunamofihi afo'afu ai'a lusi bona'a lenele'mo lolo hu su holoto, to lenele'mo bati bati hulenogo komopatini lenemehatini lenugufatini bati hinogo minenogo Sipi Boti Yesu Kilisitou nehetilina kana'alo kolo tanana meminenogo minalabe. 24 Hu'mau lenali yagapana'a lenele'mo'ehina bouba, ya'ma hu lepalalube luto kaga molo'ehina'a mehe'mise lelito buto li su halina'mu yabe.

25 Lalalutigita, lali kumu yabe lite kehelite Hu'mamofitoga nunumu lite minalo. 26 Kilisitohi naga'i asaga'i soso hu epoloto enebe tigilo. 27 Nani Poluita Sipi Bomofihi gobisalo ma luto lu nolepube. Ya'ma fayapo Kilisitohi naga'a silaga'i leka sete lu epilenogo keheli su helete minalabe.

28 Sipi Boti Yesu Kilisitohi lenehe'mose'na'a lenalitoga minomo buto mineno.